Listamannsíbúð á Spáni

Listamannsíbúð í þorpinu Garrucha við Miðjarðarhafið er íbúð með vinnuaðstöðu, sem boðin er til dvalar fyrir íslenska listamenn og rithöfunda.

Staðsetning:

Garrucha er lítið sjávarþorp í norðurhluta Almería-héraðsins og er íbúarfjöldi um 9.000 manns. Bærinn hefur fjölbreytt val verslana, sem og útibú helstu banka. Einnig er bókasafn og kvikmyndahús á staðnum (á sumrin eru myndir sýndar undir berum himni), og götumarkaður er haldinn á föstudögum sem selur ávaxti og grænmeti.

Stemning bæjarins einkennist af lífinu í kringum sjómennina og trillurnar sem leggjast síðdegis að bryggju við fiskmarkaðinn. Rauða rækjan, túnfiskur og “gallo pedro” er eftirsóttar tegundir á svæðinu.

Áhugaverðir staðir til að skoða, annað hvort með bílaleigubíl eða rútu, má nefna:

Þjóðgarðinn Cabo de Gata

Sögufræga bæinn Nijar

Fjallaþorpið Mojacar

Einnig er einfalt að ferðast til Granada sem er í 230 km fjarlægð vestur af Garrucha. Sérstaklega er mælt með að skoða La Alhambra arabahöllina.

Listamannsíbúðin í “Edificio Los Arcos”, Paseo del Malecón nº11, 3ºA. 04630 GARRUCHA (ALMERÍA):

Íbúðin er staðsett í íbúðarblokk með garði við norðurjaðar Garrucha með útsýni yfir á hafnarsvæðið (smábáta/flutningaskip) og strandlengju bæjarins, sem oft iðar af lífi. Hinum megin við blokkina er önnur strönd, löng og nokkuð kyrrlátari, þar sem villtur gróður vex í sandinum. Þess má geta að gamni að póstkort Garrucha er tekið frá þaki blokkarinnar.

Íbúðin er 100 fermetrar og snúa allar hliðar hennar út á götu (þ.e. engin snýr inn á sólarlausan innanhússgarð). Loftræsting er góð, þversum í gegnum íbúðina.

Um er að ræða þriggja herbergja íbúð með tveimur baðherbergjum og vinnuaðstöðu. Stór suðurgluggi framhliðarinnar hleypir birtu inn í allt vinnurýmið. Í góðu veðri er hægt er að opna hann allan og breytist rýmið þá í eins konar verönd. Hliðarveggirnir hafa froðuplastspjöld til að hengja módel og vinnuteikningar á. Einnig má negla á veggi (frá 9:00 til 21:00 virkum dögum) ef þörf ber á.

Svefnaðstaða er fyrir allt að 8 manns: eitt tvíbreitt rúm og 6 kojur. Sængurver, koddar og teppi, sem og handklæði eru innifalin.

Þvottavél er á staðnum. Aðstaða til að þurrka þvott er á þaki blokkarinnar.

Eldhús: pottar, diskapör og önnur áhöld eru til staðar.

Sjónvarp og tvö hjól eru í íbúðinni.

Matvöruverslanir eru rétt við blokkina. Verð á matvöru er mjög hagstætt og matarkarfan ódýr.

Trygging:

Íbúðin er tryggð. En tryggingin felur ekki í sér persónlegt tjón eða á listaverkum dvalargesta. Ef viðkomandi hefur ekki eigin tryggingu er engin leið að fá þjófnað eða skemmd á verkum/eignum bætta.

Skemmdir á fasteign eða innanstokksmunum hennar af völdum leigutaka eða þeim sem dvelja í fasteign er á ábyrgð leigutaka og skulu greiðast að fullu. Komi til þess að tjón er uppgötvað eftir að dvöl er lokið, hefur eigandi rétt til senda leigutaka reikning, liggi næg sönnunargögn fyrir kröfu.

Fyrirfram innborgun:

Upphæð þrjátíuþúsund krónur sem staðfestingargjald (endurgreitt við lok dvalarinnar eftir skoðun).

Dvalargestir skuldbinda sig til að hlíta reglum íbúðarblokkarinnar varðandi afnot af húsnæði og vinnuaðstöðu, þ.á.m. er ætlast til að þeir nýti íbúðina allan úthlutunartíma sinn og skili henni hreinni að dvöl lokinni, að undanskildum þvotti.

Virða ber nágranna. Hávaða skal lágmarka á öllum tímum.

Auglýst er eftir umsóknum um afnot listamannsíbúðarinnar, fyrir listamenn, handverksfólk og rithöfunda. Umsóknir, með stuttri lýsingu á því verkefni sem umsækjandi hyggst vinna að, skulu sendar á netfang:

halldora@sarq.org